ခပ်ထုံထုံ ခပ်အအ ခပ်နနကောင်

ကျတော် အရိုးသားဆုံးပြောရရင် မလိမ်တတ်ဘူး။ သူတစ်ပါးကို လိမ်ရင်လဲ အလိမ်ပေါ်တာများတယ်။ အဲ ကျတော်ထက် အ တဲ့ သူကိုတော့ လိမ်လို့ရမှာပေါ့ဗျာ။

ငယ်ငယ်တုန်းက အိမ်မှာ ငါးပိကြော်တွေ ဘာတွေကြော်ရင် ကျတော်က ခိုးစားနေကျ။ ကျတော်တို့ အိမ်မှာက ငါးနီတူခြောက်လေးတွေကို ငရုတ်သီးလေးနဲ့ မကြာမကြာကြော်စားလေ့ ရှိတယ်။ အဲဒီလိုကြော်ပီဆို ကျတော်လူကြီးတွေ အလစ်မှာ မီးဖိုချောင်ထဲဝင် ခိုးစားနေကျ။ တစ်ခါပေါ့ ကျတော်ခိုးစားတာ အိုးအဖုံးက ပြုတ်ကျပီး ဂလုံဂလွမ်မြည်ပါရော။ ဒါနဲ့ အသာလေးပုံးနေတာပေါ့။ လူကြီးတွေ မသိလောက်ဖူးဆိုမှ အိမ်ရှေ့ထွက်တယ်။ အိမ်ရှေ့ရောက်တော့ မာမီက သားကြီး ငါးပိကြော် ခိုးစားတယ်မဟုတ်လားလို့ မေးတယ်ဗျ။ ကျတော်က သားသားမစားပါဘူး လို့ လိမ်တယ်။ ဒါပေမဲ့ဗျာ ပါးစပ်မှာ အကွက်လိုက်ကြီး အဆီတွေ ဝင်းနေတာကို မားမားတို့မသိပဲနေမလားဗျ။ အဲဒီလောက် အလိမ်တော်တာ။

တစ်ခါလဲ စလုံးမှာ ငါးကြော်ခိုးစားပါတယ် အိမ်မှာ ဘယ်သူမှ မရှိတုန်းပေါ့။ အဲဒီ ငါးကြော်ခိုးစားမှုဟာ အွန်လိုင်းပေါ်တောင် ရောက်သဗျ ။ လိမ်တက်တာပြောတာပါ။

ရိုးသားမှုနဲ့ အတူ ပွင့်လင်းမှုကလဲ ပါလာမြဲပါ။ ဒီစာကို ရေးတာက ကျတော်ကို ပွင့်ပွင့်လင်းလင်း မပြောတဲ့ အစ်ကိုတစ်ယောက်ကြောင့်ပေါ့။ ကျတော်ကတော့ ကျတော့်အရှိအတိုင်း အတော်များများကို အပွင့်လင်းဆုံးပြောတတ်တယ်။ သူကျတော့်ကို ပြောသင့်တာ ပွင့်ပွင့်လင်းလင်းနဲ့ ညီရေ ဘာဖြစ်တယ် ညာဖြစ်တယ် ဒါကြောင့် အဲဒါကို လှူမယ်ပေါ့။ ဒါပေမဲ့ဗျာ....

ကျတော်က အရှိကို အရှိတိုင်း ရိုးရိုးသားသားပြောတတ် တွေးတက် လုပ်ကိုင်တတ်တော့ ကျတော်သယ်ရင်းက မှတ်ချက်ချပါတယ် ။ မင်းက “အ” ရုံတင်မကဘူး။ တုံးပါတုံးတာတဲ့ဗျ။ ပြောချင်လဲ ပြောပါစေ။ ကျတော်ကတော့ အားလုံးအပေါ်မှာ အရင်အတိုင်း ဆက်ဆံရင်း ”ခပ်ထုံထုံ ခပ်အအ ခပ်နန ကောင်” အဖြစ်နေသွားမှာပါလေ။

photo: rebekccahkim .file.wordpress.com